تجربة تجريدية


فجأه الجو ولا صقع , ما فيش حد قالي الحق ! ارتفعت حرارتي وجتني برده , البرده الي ليها فوق 10 شهور ممكن معاش أنستنا و فجأه حتى هي الحراره بدت ترقا ترقا لين قررت ندون أي حاجه في هذه الساعات وننشرها طول – ممكن تكون أخر تدوينه , شن دراني انا : |

المهم أنا نحب بابا وماما وليبيا وتونس ومصر ومالطا , اهمهم مالطا , المهم الحكايه انك ادون باللهجه العاميه , هكي البفلاقي فرنكلي مزطوري ديسكو فرسيوني – الزح حتى من الفلاقي متاعنا ضاربه الغزو الثقافي , توينك يا قايد جاتك مهاتفه !

انا ليا فتره نبي ندون لكن الروح التدوينية – هذه زي الشيطان متاع الشعر – المهم الروح هذه هاربه , الروح موضوعها موضوع تخاف يوم تلقاها متجسده وتقول انا المش عارف شن والعياذ بالله !

عن نفسي نشوف في التدوين بالعامي فيه جو , لكن المشكله انه مش كل اولاد بلادك حيفهومك والمشكله الي تواجه فيا في العاده أنه الاملاء كيف تكون ؟ همزة وصل تاء مربوطه والا ياء بطة ! البطة هذه دارتلي خط زمان , الأبله من جيهه تقول ياء بطه ومن جيهه ترسم بيها وزة ! وانا ساكت ما عندي مندير , باي دا وي – هذه بالانجيزي – , لما كنت في صف أول كانت تقرا معاي بنيه اسماها ايناس كانت حلوه لكن المشكله مش هنا المشكله انه في صف أول مرو عليا تسع أبلات , يا تموت يا تحمل يا يلز فيهم المدير – طفوله صعبه للأسف : \\

الروح التدوينية خاصه للمدونين نشوف فيها حاجه جدا مهمه لأنه المدون في العاده انسان عادي بس يدون , يعني مش كاتب او قاص او حاجه هكي , هديما الاخيرين احترافيين امتى ما يبي يكتب يكتب وزياده يكتب ع الشيء الي يبيه او يبيه الي يدفع في الفلوس , اما احني – او انا – كان ما جت الروح ما يصير شي .

التدوينة هذه هكي تدوينة من أجل التدوين أو حاجه حبيت نجرب فيها التدوين باللهجه العاميه او اللغه المحكيه والا سموها كيف ما تبو تسمو , وحبيت ان نتواصل مع المدونة , نخاف لو نزيد نبعد تموت الروح مره وحده ونبدو نعيطو بعدين زي ناس واجده كانت تكتب وبطلت وصايرلها توا ! المهم الجنازه كان سخر ربي في سيدي أحمد الزروق , نحب نسمة البحر سمحه . ما تقولوش ما وصيتكم .

هي سلمتو يا عرب \ مازيغ \ تبو \ وباقي الأقليات المستعربة هوو .

Advertisements

الكاتب: Amjad Badr

Libyan Blogger, Scout Leader and Social Entrepreneur, interests in Climate Change and I.C.T and specialized in Computer Engineering, CEO & Co-founder of Hexa Connection and Founder & GM of Jawhar Co..

5 رأي حول “تجربة تجريدية”

  1. #مبدع (Y) وعندك حس فكاهي .. وع الإملاء أني نساعدك إدلل هههههه ..
    وأهم شيء في التدوينة إن إسمي كان حاضر :))
    وع زميلة الصف السادس كان بودي نقولك أني ؛ بس أني لما كنت في الصف السادس كنت خارج البلاد 😀

    1. ههههه انا نرعا , لا ايناس كانت معاي صف أول , مريض منكتب اول كتبت سادس =))
      وزياده كانت معاي في الفرقه الموسيقيه لول ..
      منوره ع المرور ^_^

  2. مع أنّي لست منن محبّي التدوين بالعامية
    لكن الخرط اللي كتبته أنت
    يجول في داخلي ليه مدة و مش عارف نصيغه
    و أنت جبت التايهة
    روح الكتابة او الوحي أو الخط
    أو بنات الأفكار أختلفت التسميات لكن المعنى واحد
    أشياء لن يدركها إلا من يستمتع بحضورها
    ….
    عظم الله أجركم
    قصدي إنش اء الله لا بأس عليك ^^

  3. همممم، خسارة لعند توا ما متتش كنت نبي نحقق وصيتك ونحضر الدفينة ماه!
    كيف حال مِس حرارة باللهي؟ ليها زمان معش كلمتني سلملي عليها!

    1. نخاف نسلملك عليها تتفكرك , قاعد نتعارك انا واياها يوم نفوزها توا نبعتها لك -_-

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

This site uses Akismet to reduce spam. Learn how your comment data is processed.