تكوبيسة عشيه !

تك تك ! خش في الموضوع ع السريع !
اليوم بعد ما روحت من الكليه وانا مستمتع بمحاضرة الدكتور – تم شطب الإسم خوفا من البلابل الزايدة – مادة ” داتا بيز ” ..
مشيت نراجع في المحاضره على التابلت* الي سلماته ليا الكليه أول ما خشيت وفيه أبديت لكل المناهج وطرق التواصل مع أعضاء هيئة التدريس ع السيرفز الخاص بالقسم كل سمستر بالسمستر متاعه !

وانا نشوف في النفكيشنز لقيت الدكتور داز* هوم ورك .. قررت نشمر ع سواعدي ونفتح اللاب توب الي مسلماته ليا الكليه حتى هو بيش ندير الهومورك والمتطلبات الأخرى ونحاول نبدع من أجل بلادنا الحبوبه – إيه حبوبه يا طه – !
فتحت اللابتوب وبعد ما فتحت النت وخشيت ع الأكسس الخاصه لطلبة الجامعه  لقيت رساله من مركز المعلومات متاع الكليه فيها الكي متاع وينديز 8* بيش انزلوه ونواكبو الجديد ..
نزلته ودرت الكي والجو تمام .. قلت يلا بلا ضياع وقت نبدو في الجد ! الدكتور يبي الهومورك بعد أسبوع ..
فتحت مايكروسوفت أوفيس بروفيشنال* برنامج الأكسس الي جاي مع اللابتوب ” ربي يحفظهم ” وبديت خدمه ليه لوه ! على أنغام فيروز المسكينه ماحدا نطرها والدنيا شتي والمطر تصب كنها معانا راه الباص متاع الجامعه يروح بيها لحوشهم مسكينه في طرابلسهم مش طرابلسنا 😐
المهم تميت البرنامج واشتغل ودرتله أبلود وبعته للدكتور إلي طول رد عليا وقالي أحسنت .. فرحت وحسيت روحي منتشي وقررت نمشي نلعب رياضه ماه الزسم السليم في العقل السليم ” هكي قالت خالتي الحاجه ” .. سكرت اللابتوب ودرت له شت داون ! وهو يتسكر هكي ! ويغني ترنانانا لقيت روحي نايض متكوبس* راعش ! راقد العشيه والمغرب أذن والدنيا ظلام ! !

دمتم بود !
حاسوبي واهم ! ويفتخر بعد بعيد 😐

_________________________
معاني الكلمات :
التابلت : كبيوتر لوحي ” هكي حاجه زي الأي باد يقدر حقه أقل شيء بـ 800 دينار ” ..
داز : باعت يعني أي : He send ” بالشرقاوي ماه ليبيا هبره وطنيه ” ..
ويندوز 8 : حاجه بعد ويندوز 7 هكي لما تفتح الكمبيوت تخدملك ” النسخه الحلال الأصليه بـ 70 دولار ” ..
مايكروسوفت أوفيس بروفيشنال : هذا البرنامج الي فيه الوورد والباوربوينت ” النسخه الحلال الأصليه بـ 350 دولار أضربها في 1.21 دينار ” !
متكوبس : يعني وهو راقد جاه كابوس !

الإعلانات

عمود رتويت

# هاش تاغ

من التويتر إلى الصحافة , هي الغاية ! والهدف إيصال صوت المغردين لكافة شرائح المجتمع . الفكرة ليست بجديدة كانت تتخبط وتنمو في هدوء حتى بلورت اليوم .

عمود #رتويت : الفكرة متمثلة في تحديد وسم معين ” هاش تاغ ” لكل أسبوع ويكون الأبرز في الشارع التويتري , يكون التفاعل عن طريقه عبر شبكات التواصل الإجتماعي , ويتم إنتقاء العدد المناسب من التغريدات حسب المطلوب وتنشر تحت أسماء معرفاتهم الخاصة .

اليوم هناك أمل ! قد تخرج الفكرة أخيرا إلى أرض الواقع , عن طريق مجلة ” نيوميديا ” التي نترقب صدور أول أعدادها من مدينة ” بنغازي – ليبيا ” قريبا والتي كلفت بالشق الإلكتروني بها . : )

 

وقفت في الكورنور .. كلمتني !

وقفت في الكورنور .. كلمتني !

بالرسمي .. قد سلبت عقلي !

حياءها .. فتن قلبي !

ابتسامتها دارت في شوارع وطلعتني من فكري !

أسرته .. وسرقاته ودهبت شيرتي !

يا ويحها يا ويحها .. غير شن درنالكم يا حبيبتي !

آهٍ وخلاص !

الأيام كيف الريح في الدرجاحه | سيدي قنانه

ليام كيف الريح فـي الدرجاحه

مره شقا الخاطـر ومـره راحـه

يَـقْــعــدن ويـمـيـلــن

ويديرن حوايج ما عليـك يخيلـن

ويحطّن حواهن ع القوي ويشيلن

ويخلّن العالي في الوطى مطروحه

اوقـات نـخـدم بـيـدي

واوقات يبـدوا كاثريـن عبيـدي

واوقات عشر كباش يبداً عيدي

واوقات ما نكسب ولا صّياحه

عن ديوان الشعر الشعبي الجزء الأول منشورات جامعة قاريونس

عليك وقت | بن رويلة المعداني

قصيدة : عليك وقت ! للشاعر : بن رويلة المعداني المتوفى 1943 ..

عليك وقت متعاكس غلب هـندازه – وكـل قلب شايل م الْهموم مزازه

***

وقــت زْقُــوزه – وعاد يبْرْزوا برْزة نْجوم الـزَّوزه

واطى عرب كانت ثقـال الرَّوزه – شَّيع اللى كـانت لـهم زرْمـازه

اليوم الحَبارى يضربَنْ فى الحَوْزه – ونَقْب الصّْقُـوره ع الْوطا عزَّازه

وكم زغْزْغِى منَّه تْخاف الحـوزه – توطَّى وصار الخرْبْ فى مـركازه

***

وقــت مــلاحه – مشايْخـه مشايخ شَوْشده وقباحـه

لا للعرب فيهم صـلاح وراحـه – فى مكانهـم داروا مشـايخ عـازه

***

وقــت ندامــه – الله لا يدُومَـه كشْـرْ هو وايّامـه

خلّى جمـاعة ذايْحـه خدّامــه – عساكـر بْغـير فْلوس للزَّنهـازه

بين الحجـر والقشّ والفَحَّــامه – أولاد البْيوت خْسـارهم فى العازه

ما تْقول كـانَوْا يظْهـروا عزّامه – ولا تقول كـانوا يركبوا ميَّــازه

الله يجعله قْـرَيّب قْصـار ايامـه – ويجِى زمـان اخرى نظيف قزازه

***

تزرع تحصد !

كاريكاتير من الشبكة
كاريكاتير من الشبكة

يبو المردود وما يعطو شي ! جو كلا اساتذتنا , يشري في الزريعه يرمي فيها في التراب ويراجي في الشعير ينبت , لا شاف التراب صالح ولالا , ولا شاف الزريعه فاسده ولالا , يرميها في بعض بالعمياني ويقعد يراجي ويقول ليش فيش نتائج !

ايه عادي يجيك الدكتور ويقولك امريكا والطلبه في السويد ! شوف الزريعه والشوف التراب غادي ! شوف المية والدواء والاهتمام ! حتى كان في زريعه فاسده لكن التربه صالحه ميه ميه ! فيجي ياخد يقارن بين المردود والناتج , يقارن الطالب الليبي بالياباني ! لكن ميقارنش في الدكتور الليبي بالياباني – سقع عليه -! ولا المنهج الليبي بالياباني ولا ولا ولا وحاجات اخرى واجد ! وبعدين مش عاجبه ! ايه عادي ايه ! وفرلي وبعدين حاسبني بكل دقه ومعياريه

حررت : 5 يناير 2012

السمينسة ولا أنتم !

القذافي قالها بصوت عالي : لو عندي منصب للوحة الاستقالة ع وجوهكم !

واليوم يكررها احد الأساتذه بصوت أعلى ومنطق أخر :  لو نبيع السمينسه في المحطه اكرملي من ان نقريكم لكن فيش بديل ! وتستمر معانات الطالب في ليبيا .
الطالب الذي أشغلوه عن العلم بالبحث عن عضو هئية تدريس بديل وعن العضو نفسه قبل البديل , البحث عن الكهرباء للمعمل والبحث عن المعمل بحد ذاته ! اوك نحطوها ع القذافي وتركة الدسمة الناتجة عن كم وأربعين سنة , لكن اين وزارة التعليم العالي في هذه المرحلة الانتقالية الحسحاسه ؟ ولا كيف ما احتفلة سعادته بالكرسمس وراس السنه في امريكا – نعيم الغرياني – بيحتفل بعيد الميلاد حسب التقويم الشرقي في نهاية شهر واحد ونحن ولا حد معبرنا ! نبنو ليبيا ؟ هئ .

حررت 2 يناير 2012