الأيام كيف الريح في الدرجاحه | سيدي قنانه

ليام كيف الريح فـي الدرجاحه

مره شقا الخاطـر ومـره راحـه

يَـقْــعــدن ويـمـيـلــن

ويديرن حوايج ما عليـك يخيلـن

ويحطّن حواهن ع القوي ويشيلن

ويخلّن العالي في الوطى مطروحه

اوقـات نـخـدم بـيـدي

واوقات يبـدوا كاثريـن عبيـدي

واوقات عشر كباش يبداً عيدي

واوقات ما نكسب ولا صّياحه

عن ديوان الشعر الشعبي الجزء الأول منشورات جامعة قاريونس

Advertisements

عليك وقت | بن رويلة المعداني

قصيدة : عليك وقت ! للشاعر : بن رويلة المعداني المتوفى 1943 ..

عليك وقت متعاكس غلب هـندازه – وكـل قلب شايل م الْهموم مزازه

***

وقــت زْقُــوزه – وعاد يبْرْزوا برْزة نْجوم الـزَّوزه

واطى عرب كانت ثقـال الرَّوزه – شَّيع اللى كـانت لـهم زرْمـازه

اليوم الحَبارى يضربَنْ فى الحَوْزه – ونَقْب الصّْقُـوره ع الْوطا عزَّازه

وكم زغْزْغِى منَّه تْخاف الحـوزه – توطَّى وصار الخرْبْ فى مـركازه

***

وقــت مــلاحه – مشايْخـه مشايخ شَوْشده وقباحـه

لا للعرب فيهم صـلاح وراحـه – فى مكانهـم داروا مشـايخ عـازه

***

وقــت ندامــه – الله لا يدُومَـه كشْـرْ هو وايّامـه

خلّى جمـاعة ذايْحـه خدّامــه – عساكـر بْغـير فْلوس للزَّنهـازه

بين الحجـر والقشّ والفَحَّــامه – أولاد البْيوت خْسـارهم فى العازه

ما تْقول كـانَوْا يظْهـروا عزّامه – ولا تقول كـانوا يركبوا ميَّــازه

الله يجعله قْـرَيّب قْصـار ايامـه – ويجِى زمـان اخرى نظيف قزازه

***

تزرع تحصد !

كاريكاتير من الشبكة
كاريكاتير من الشبكة

يبو المردود وما يعطو شي ! جو كلا اساتذتنا , يشري في الزريعه يرمي فيها في التراب ويراجي في الشعير ينبت , لا شاف التراب صالح ولالا , ولا شاف الزريعه فاسده ولالا , يرميها في بعض بالعمياني ويقعد يراجي ويقول ليش فيش نتائج !

ايه عادي يجيك الدكتور ويقولك امريكا والطلبه في السويد ! شوف الزريعه والشوف التراب غادي ! شوف المية والدواء والاهتمام ! حتى كان في زريعه فاسده لكن التربه صالحه ميه ميه ! فيجي ياخد يقارن بين المردود والناتج , يقارن الطالب الليبي بالياباني ! لكن ميقارنش في الدكتور الليبي بالياباني – سقع عليه -! ولا المنهج الليبي بالياباني ولا ولا ولا وحاجات اخرى واجد ! وبعدين مش عاجبه ! ايه عادي ايه ! وفرلي وبعدين حاسبني بكل دقه ومعياريه

حررت : 5 يناير 2012

السمينسة ولا أنتم !

القذافي قالها بصوت عالي : لو عندي منصب للوحة الاستقالة ع وجوهكم !

واليوم يكررها احد الأساتذه بصوت أعلى ومنطق أخر :  لو نبيع السمينسه في المحطه اكرملي من ان نقريكم لكن فيش بديل ! وتستمر معانات الطالب في ليبيا .
الطالب الذي أشغلوه عن العلم بالبحث عن عضو هئية تدريس بديل وعن العضو نفسه قبل البديل , البحث عن الكهرباء للمعمل والبحث عن المعمل بحد ذاته ! اوك نحطوها ع القذافي وتركة الدسمة الناتجة عن كم وأربعين سنة , لكن اين وزارة التعليم العالي في هذه المرحلة الانتقالية الحسحاسه ؟ ولا كيف ما احتفلة سعادته بالكرسمس وراس السنه في امريكا – نعيم الغرياني – بيحتفل بعيد الميلاد حسب التقويم الشرقي في نهاية شهر واحد ونحن ولا حد معبرنا ! نبنو ليبيا ؟ هئ .

حررت 2 يناير 2012

النظرية التعليمية الأولى !

التعليم في ليبيا ! هذا ما يحصل عندنا في قاعات الدراسة , تطبيق فعلي ومباشر للمعادلة المعروفة : زاوية السقوط = زاوية الانكسار ! لكن هنا المعلومة بالكتاب = المعلومات بالصبورة , بدون تبسيط او تلخيص أو حتى شرح ! لتأكد من جديد قانون بقاء الطاقة التي لا تفنى ولا تستحدث – إلا بإذن الله! – بطريقة أو ما !

يعني الي في الكتاب مصبوب صب في الصبورة ! يعني حضرة الأستاذ الدكتور المعلم المحترم ليس سوى عبارة عن عاكس صورة صندوق العجائب – كيف ما يسمو فيه زمان – ” الداتا شو ” , المشكله حتى الداتا شو تفهم منها احسن منه ! وغني يا بوعجيله .

حررت : 14 ديسمبر 2011 .

الطارقة المحرره

385521_236603773077613_551646912_n
مقترح عام

.

” يا ويلاه يا ويلاه ” ! صاحت .

سكت دهرا ونطق كفرا ! هذا ما حصل مع وزير داخليتنا في حكومة الكيب الكئيب المؤقته , لم يتكلم عن أي تأمين لحدود أو عن أي خطة لنزع سلاح أو تكوين مؤسسات أمنية سليمة البنيان والتباعية .
ولكن نطق ! نعم نطق بعد شهر من استلامه لمنصبه , ويا ليته لم ينطق ! نعم انها احدى المراسيم الوزارية الأولى لأول وزير داخلية لليبيا الجديدة , ” قرار بشأن اللوحات المعدنية للمركبات ” قد كان !

ما الفرق ؟ لا فرق سوا تغير ” الجماهيرية ” إلى ” ليبيا ” وكأن ليبيا فعلا قد تغيّرت فقد قد حررنا الطارقة * , فقط الأسماء لكن المكامين لها رب كريم . شطب على الجماهيرية لكنه حافظ على شعبياتها  وتقسيماتها وفكرتها وأفكارها .

سداجه ما بعدها سداجه هذا ما أوحى – قرار معالي المحترم الوزير ! ماذا استفادت منطومة المرور المعطوبه من هذا التغير ؟ بعد ان كانت اللوحة متكونة من ثلاث تقسيمات : الشعبية والمنطقة ورقم المركبه , دمج الأخيران وأصبحنا نتكلم في الملايين ! من يستذكر ؟ لا أحد . ناهيك عن مهية التقسيمات الجديدة للمدن والمناطق , البلديات والمحافظات يا سيدي صاحب الثلاث والعشرين شعبية ! يا مؤمن .

مؤمن بالفكر محافظا على تريقيم المناطق ذات البعد اللا منظور , رحلة القذافي ومحطاته المختلفه في الأربعة ألاف يوم حتى فجر سبتمبر التاسع والستين !

بعيدا عن هذه السداجات والنظر المفقود والبعد الضائع في ضباب الثورة , هذا ما رأيته بخصوص اللوحات المعدنية بعيدا عن الترقيم وتسهيلا للحفظ والتسجيل واتقاءا لشر المفتنين , ملونة بسيطة .
عندما تصدمه واحده يشتكي الشرطي قائلا : لقد كانت ” مطر 392 ” , لا ” ليبيا **2435 – 5 ونسيت رقمين ” !

و ” مطر 392 ” تمثل حروفا وأرقام على سبيل التوضيح :
الحرف الأول اختصار للمدينة , م : مصراته .
الحرف الثاني للمنطقة , ط : طمينة .
الحرف الأخير حرف اختياري يترك للمواطن , ر : ريما اسم ابنته الصغيره .
والأرقام كذلك للمواطن إختياريه , 392 تاريخ ميلاد أو ذكرى جميلة .

.

__________________________________
* طارقه وهي اللوحة المعدنية للمركبات .

راسك فوق وعيونك تحت !

الليبيين الأحرار مسكرين الطريق ميبوش الاحرار الليبيين يخشو ! والليبيين الاحرار يراجو في الدكتور الحر الي ماجاش للعمل ! وسواقي شاحنات البنزينه الأحرار ميبوش يوصلوها للأحرار الليبيين ! فالحر الليبي معاش عرف شن يدير الا انه حر ! ويقلوله ارفع راسك فوق ! انت ليبي حر ! بس ياعم رد بالك من الحفره الي قدامك !!

يعني من لاخير : متصدقوهمش ! يجرو بيكم ! يقلولك : ارفع راسك فوق انت ليبي حر .. بيش وانت رافعه تمشي تطيح في اول حرفه ولا تخبط في اول طابيه !! والي ينقص ينقص ويقعدلهم الباقي !!

الفيديو هذا درته زمان كنت نتعلم ونجرب .. بس فيه فكره صح ^^

حررت 6 ديسمبر 2011 ..