هنا جلس الفيل

مساء الخميس على غير العادة، شاءت الأقدار أن أتصفح بريدي الالكتروني في وقت متأخر من النهار، ليصلني ذاك البريد، الخبر عن كمية الضحايا حول العالم، عن الجرثومة الدقيقة، عما فعلت بشعب الحرير وفي طريق الحرير حتى أرض السكسون وما بعدهم من فرنكس ودونهم من أبناء عمومة لاتينيين، الخبر لم يمهلنا كثير، فاليوم هنا بماء هناك، فما انتقلت إلى الصفحة التالية حتى كنت في المخبر أبحث عن أحدهم ليأخد عينة! متابعة القراءة “هنا جلس الفيل”

تجربة تجريدية

فجأه الجو ولا صقع , ما فيش حد قالي الحق ! ارتفعت حرارتي وجتني برده , البرده الي ليها فوق 10 شهور ممكن معاش أنستنا و فجأه حتى هي الحراره بدت ترقا ترقا لين قررت ندون أي حاجه في هذه الساعات وننشرها طول – ممكن تكون أخر تدوينه , شن دراني انا : |

المهم أنا نحب بابا وماما وليبيا وتونس ومصر ومالطا , اهمهم مالطا , المهم الحكايه انك ادون باللهجه العاميه , هكي البفلاقي فرنكلي مزطوري ديسكو فرسيوني – الزح حتى من الفلاقي متاعنا ضاربه الغزو الثقافي , توينك يا قايد جاتك مهاتفه !

انا ليا فتره نبي ندون لكن الروح التدوينية – هذه زي الشيطان متاع الشعر – المهم الروح هذه هاربه , الروح موضوعها موضوع تخاف يوم تلقاها متجسده وتقول انا المش عارف شن والعياذ بالله !

عن نفسي نشوف في التدوين بالعامي فيه جو , لكن المشكله انه مش كل اولاد بلادك حيفهومك والمشكله الي تواجه فيا في العاده أنه الاملاء كيف تكون ؟ همزة وصل تاء مربوطه والا ياء بطة ! البطة هذه دارتلي خط زمان , الأبله من جيهه تقول ياء بطه ومن جيهه ترسم بيها وزة ! وانا ساكت ما عندي مندير , باي دا وي – هذه بالانجيزي – , لما كنت في صف أول كانت تقرا معاي بنيه اسماها ايناس كانت حلوه لكن المشكله مش هنا المشكله انه في صف أول مرو عليا تسع أبلات , يا تموت يا تحمل يا يلز فيهم المدير – طفوله صعبه للأسف : \\

الروح التدوينية خاصه للمدونين نشوف فيها حاجه جدا مهمه لأنه المدون في العاده انسان عادي بس يدون , يعني مش كاتب او قاص او حاجه هكي , هديما الاخيرين احترافيين امتى ما يبي يكتب يكتب وزياده يكتب ع الشيء الي يبيه او يبيه الي يدفع في الفلوس , اما احني – او انا – كان ما جت الروح ما يصير شي .

التدوينة هذه هكي تدوينة من أجل التدوين أو حاجه حبيت نجرب فيها التدوين باللهجه العاميه او اللغه المحكيه والا سموها كيف ما تبو تسمو , وحبيت ان نتواصل مع المدونة , نخاف لو نزيد نبعد تموت الروح مره وحده ونبدو نعيطو بعدين زي ناس واجده كانت تكتب وبطلت وصايرلها توا ! المهم الجنازه كان سخر ربي في سيدي أحمد الزروق , نحب نسمة البحر سمحه . ما تقولوش ما وصيتكم .

هي سلمتو يا عرب \ مازيغ \ تبو \ وباقي الأقليات المستعربة هوو .