وتوا وين تخدم انت يا أمجد؟

هههه ما نعرفش ليش بعد تخرجت كبدت ع القسم وبديت كل شوية نديرله في زيارة – ما تصدقوش واجد كلها خدمة بس المجرم بطبيعته ديما يحوم على مكان المجريمة – الجريمة الي هيا قراية الجامعة في ليبيا بيش ما يريحش فكركم لبعيد -المهم مع كل زيارة للقسم أو الجامعة نتلاقى مع لفيف من أعضاء هيئة التدريس الي درسنا درس مليح وعلمونا مهارات حياتية جميلة جدا والي أهمها دائما وأبدا هو: هاو تو سيرفايف – كيف تنجو بالعربي يعني!

بعد كل لقاء وكيف حالك وشن مداير وكيف الصحة وكيف حال العائلة الكريمة وكيف حال كريمة وشن جديدكم وكيف حال القسم وكيف حال العملية التعليمية وشن جو الطلبة الجديد وكيف حنا كنا أحسن منهم وكيف هما زمان جيلهم أحسن منا وكيف الإنسان الحجري أحسن واحد في الدنيا نصلو إلى السؤال الأهم: وتوا وين تخدم انت يا أمجد؟

وتوا وين تخدم انت يا أمجد؟

يتكرر السؤال في فنثوثانيات بسيطة في بالي بسرعة تتجاوز سرعة سيارة متجهة من النقطة أ إلى النقطة ب بعجلة تسارعية مقدارها حاجة متر على ثانية تربيع ليتردد صدى اسطدامها مع خانات ذاكرتي الدراسية الفارغة وفقا لقانون زاوية الشعاع الساقط تساوي زاوية الشعاع المنعكس بمعامل امتصاصية تؤول إلى الصفر لتنتهي هذه الفنثونات لأعود إلى الواقع مجددا منصدما متسائلا لفنثونات أخرى كيف أستاذنا يسأل سؤال زي هذا؟

كيف يسأله وهو عارف أنه الي يتخرج من القسم طول ياخدوه شركات الإتصالات معاهم موظف ويخلصو فيه ثلاثلاف دينار ليبي لا غير خاطيها يكلموه ثلاث شركات خاصة بيش يخدم معاهم استشاري في مجال المايكروكنترولر وشركة رابعة بيش يفيذهم باستشاراته على كيفية نشوء الذرة وخواصها في حالات التشحيط والتمغيط وخاطي شركات النفط الي تجري وراه والشركات الدولية الي تبي رضاه إيييييه بالله يا دكتور كيف نسيت هذا كله ت احنا خريجي الهندسة ع سن ورمح!

ومع الكيفات هذه كلها سكتت لبرهة من الزمن نفكر في شن ممكن يكون الجواب، هل نصدمه ونقوله كساد وبطاله، وإلا نقعد سنة نشرحله شن يعني منظمة غير ربحية وكيف الخدمة وهكي وإلا نمشيها خت فت ونقوله على اسم آخر جهة واخدين منها منحة ونقوله نخدم معاهم؟ لالا أسهل شيء نقوله أهو الحمد لله ماشية! به كان عنكش شن الحمد لله شن نقوله؟ اشكح استيقظ يا أمجد عد للواقع الدكتور يراجي في اجابه!

أه دكتور ماشيه الحمد لله هلبه مواضيع هنا وغادي، شن ما نحصلوش موضوع يمين يسار؟ عيب عاد ولادك نهنوك! هوك هوك هوك!

تنويه للسادة أعضاء هيئة التدريس بالقسم وغيرهم، قسمنا سقع ومليح بكل واستفدت منه أنا شخصيا ومليح جدا وليه شنة ورنة وحتى صنه، حاجه توووحفة والله فما تزعلوش وما تاخدوش على خاطركم وشكرن!
Advertisements