#أنا_أدون ماذا عنكم ؟

ما التدوين ولماذا أدون ؟ لماذا قمت أساسا بإنشاء هذه المدونة ولازلت استمر في التدوين ؟ فجأه أسئله خطرت علي لم أجد وقتا للاجابه عليها . فهي لكم , تمعنوا ان شئتم .

بدأها منير اشميلة بمدونته فالتحم به وسام السراج ولفيف من المدونين , حتى نضجة مؤخرا وتبلورة تحت عنوان : #أنا_أدون , لتنطلق قريبا بشكل اكبر وأشمل تنشر تثقافة التدوين في ليبيا وتهدف إلى اثراء المحتوى الليبي على الشبكة . فهي دعوة للجميع للتدوين عن ما حولهم من احداث مختلفة اجتماعية كانت أم سياسية ثقافية أو علمية , عن قصص , مسلسلات أو حتى المطبخ , فقط دون أنشر كتاباتك ولنساهم في تنمية مجتمعنا قليلا , عن نفسي أصاب ببعض الاحيان بعجز تدويني – ان صح التعبير – لكن مع كل مبادرة وحادث جديد نعود للساحة . هذه التدوين متأخره قليلا ولكن العجز وما أدراكم ما العجز .

#أنا_أدون , ماذا عنك ؟ ننتظر تدويناتك مرفقة بوسم المبادرة كي نساهم مع بنشرها لأكبر عدد من المدونين , لا تفكر كثيرا , باشر بالتدوين .

تجربة تجريدية

فجأه الجو ولا صقع , ما فيش حد قالي الحق ! ارتفعت حرارتي وجتني برده , البرده الي ليها فوق 10 شهور ممكن معاش أنستنا و فجأه حتى هي الحراره بدت ترقا ترقا لين قررت ندون أي حاجه في هذه الساعات وننشرها طول – ممكن تكون أخر تدوينه , شن دراني انا : |

المهم أنا نحب بابا وماما وليبيا وتونس ومصر ومالطا , اهمهم مالطا , المهم الحكايه انك ادون باللهجه العاميه , هكي البفلاقي فرنكلي مزطوري ديسكو فرسيوني – الزح حتى من الفلاقي متاعنا ضاربه الغزو الثقافي , توينك يا قايد جاتك مهاتفه !

انا ليا فتره نبي ندون لكن الروح التدوينية – هذه زي الشيطان متاع الشعر – المهم الروح هذه هاربه , الروح موضوعها موضوع تخاف يوم تلقاها متجسده وتقول انا المش عارف شن والعياذ بالله !

عن نفسي نشوف في التدوين بالعامي فيه جو , لكن المشكله انه مش كل اولاد بلادك حيفهومك والمشكله الي تواجه فيا في العاده أنه الاملاء كيف تكون ؟ همزة وصل تاء مربوطه والا ياء بطة ! البطة هذه دارتلي خط زمان , الأبله من جيهه تقول ياء بطه ومن جيهه ترسم بيها وزة ! وانا ساكت ما عندي مندير , باي دا وي – هذه بالانجيزي – , لما كنت في صف أول كانت تقرا معاي بنيه اسماها ايناس كانت حلوه لكن المشكله مش هنا المشكله انه في صف أول مرو عليا تسع أبلات , يا تموت يا تحمل يا يلز فيهم المدير – طفوله صعبه للأسف : \\

الروح التدوينية خاصه للمدونين نشوف فيها حاجه جدا مهمه لأنه المدون في العاده انسان عادي بس يدون , يعني مش كاتب او قاص او حاجه هكي , هديما الاخيرين احترافيين امتى ما يبي يكتب يكتب وزياده يكتب ع الشيء الي يبيه او يبيه الي يدفع في الفلوس , اما احني – او انا – كان ما جت الروح ما يصير شي .

التدوينة هذه هكي تدوينة من أجل التدوين أو حاجه حبيت نجرب فيها التدوين باللهجه العاميه او اللغه المحكيه والا سموها كيف ما تبو تسمو , وحبيت ان نتواصل مع المدونة , نخاف لو نزيد نبعد تموت الروح مره وحده ونبدو نعيطو بعدين زي ناس واجده كانت تكتب وبطلت وصايرلها توا ! المهم الجنازه كان سخر ربي في سيدي أحمد الزروق , نحب نسمة البحر سمحه . ما تقولوش ما وصيتكم .

هي سلمتو يا عرب \ مازيغ \ تبو \ وباقي الأقليات المستعربة هوو .